الاولمبيك من منظار زاير امناتي و حاجي امشالي
كتبهاوائل العربي ، في 25 أغسطس 2008 الساعة: 13:40 م
التقى زاير امناتي بالحاج امشالي في محل الحاج عيدان الذي يبع القماش في مدخل السوق العربي في احدى الاحياء العربية في الاحواز. بعد السلام و التسائل عن الصحة دار بينهم الحوار التالي
زاير امناتي: حاجي شفت البارحة الراقصات اللي يرقصن في الماء مثل البطوط
حاجي امشالي: نعم شفتهن
زاير امناتي: شفنا كل شي لكن ما شفنا رقص على الماء
حاجي امشالي: شقول لك! هذه علائم اخر الزمان
زاير امناتي: هذه الامرطقعات مايستحن مقابل العالم كله اميردات و ما لابسات شي
حاجي امشالي: صاحبي والله ما ادري اشلون. قول واحد بيهم يستحي، يخجل شو كلهم هيك. النوب مش بس مايستحن بل يتنافسن واحدة تسبق الثانية
زاير امناتي: اقل لك حاجي هم كلهم هيك المعرينين و ظلينا بس احنا المقبعين
حاجي امشالي: ما ادري! اظن اشلون احنا نستغرب منهم هم هم يستغربون منا و يحكون بيناتهم يقولون شوفوا هذولي اشلون متقبعين
زاير امناتي: صدق ها، و رايح ايضحكون علينا اكثر، خاصة من يدرون هنا في الاحواز الجو حار و الحرارة تذبح
حاجي امشالي: بس يقولون هذا الرقص و ما ادري بعد شنهو من العاب وياه، يسمونهن الاولمبي
زاير امناتي: والله ماادري شيحصلون، شو شي تركض او شي تحول او شي اتحول بالعصي او شي تصبح او شي تلعب تبها(كرة)
حاجي امشالي: احنا عرفنا الناس تتكارب، قبل لما كنا شباب كنا نتماطل و اقوي كان يصير صيت بالديرة، هسه هذول هم كل واحد يعرف له شي واحد ايحول واحد يرقص واحد يسبح و كل واحد خوش ولد بيهم يعطون مدال ذهب
زاير امناتي: حاجي شتقول هم حتى الحبايب يتماطلن و يركضن اسرع من الزلم و ايجحولن اتجحول. شفتهن البارحة؟
حاجي امشالي: ها! واحنا حبيايبنا اشلونهن
زاير امناتي: حاجي شتقول هسه خليك عن الحبايب، اولادنا اشلون! بيهم هيك ايركضون. يلا او بعدين لمن نركض نركب السيارة و وين ما نريد نمشي
حاجي امشالي: زاير هم هذول الاجانب عالهم غير عالم. شفت بهاي الالعاب؟ قول زلمة عاين له لمرأة؟
زاير امناتي: حاجي هن مش نسوان تقولنهن زلم. كل شي اللي الزلم ايسون هن هم ايسون.
حاجي امشالي: زاير امناتي مثل ماتقول هم كلهم واحد مثل الاخر و بس احنا اللي نختلف وياهم. والله ما ادري الدنيا اشلون صارت! قبل، بزمن اجدادنا احنا كنا سادت العالم و كلها كانت تتكلم بالعربي، اليوم صرنا احنا يشار الينا بالبنان و اصبحنا غرباء عن العالم.
زاير امناتي: حكيك كله صدق. شو احنا لانلبس مثلهم، لا نحكي مثلهم و لازلمنا و لانسوانا مثلهم. بالحر الجنهمي …. خلينا عن هذا الحكي، احنا بعد كبرنا و كل اللي انشوف جديد لنا.
في هذه الثناء بعثر الحوار صوت بائع الفواكه و هو يقول خيعونك يالعمتك ميته(هنيئا لك اللي عمتك ام زوجك ميته و ليست موجودة)
و انقطع الحوار بضحك الحضور و كلمن لبس مزويته و امشى.
ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج | دوّن الإدراج
